වර්තමානය වන විට, ලොව බහුලවම පවතින පිළිකා විශේෂය ලෙස සලකනුයේ, පියයුරු පිළිකා වේ. එමෙන්ම දෙවනුව, වැඩිම කාන්තාවන් ප්‍රමාණයක් මියයෑම සිදුවන පිළිකාව ද, පියයුරු පිළිකාවම වේ. එම නිසා පියයුරු පිළිකා හඳුනාගත් සැනින්, පිළිකා වර්ගය, පිළිකාවේ පැතිරීම හඳුනාගෙන ප්‍රතිකාර ලබාගැනීම වැදගත් වේ.
පියයුරු පිළිකා ඇතිවීම සඳහා බලපාන හේතු සහ අවදානම් තත්ත්ව :-
- කාන්තාවගේ වයස:-වයස වැඩිවීමත් සමඟ පියයුරු පිළිකා ඇතිවීමේ අවධානම වැඩි වේ.
- ස්ත්‍රී / පුරුෂ භාවය:-පුරුෂයන්ට වඩා කාන්තාවන්ට පියයුරු පිළිකා ඇතිවීමේ අවධානම 100 ගුණයකින් වැඩි වේ.
- ආර්ථවහරණය සිදු වූ කාන්තාවන්ගේ ශරීරයේ බර හා තැන්පත් වූ මේද ප්‍රමාණය
- උසින් වැඩි ගැහැණුන්
- සමහර පිළිකාමය නොවන ගෙඩි පියයුරු වල තිබූ කාන්තාවන්
- පියයුරු වල තද ගතිය (පියයුරු වල තද ගතිය අඩු කාන්තාවන්ගේ පිළිකා තත්ත්ව ඇතිවීමේ අවධානම අඩුය.)
- හෝමෝනමය උපත් පාලන ක්‍රම හා ප්‍රතිකාර(මේවා වෛද්‍ය නිර්දේශයට අනුවම ලබා ගත යුතුය. කිසි විටෙක ඔබගේ හිතුමතයට මෙම ඖෂධ ලබා ගැනීම සිදු නොකරන්න)
- ඔසප් වීම ආරම්භ වීමේ කාලය සහ ඔසප් චක්‍රය නැවතීමේ (ආර්ථවහරණය ) සිදු වන කාලය මත.ඉතා අඩු වයසේදීම ඔසප් වීම ආරම්භ වීම සහ ඔසප් චක්‍රය නැවතීම (ආර්ථවහරණය) සිදු වන වයස ඉතා වැඩි නම්, පියයුරු පිළිකා ඇතිවීමේ අවධානම වැඩි ය.
- පියයුරු පිළිකා පිළිබඳ පවුල් ඉතිහාසයක් පැවතීම.
- දරුවන් නොමැතිවීම සහ මව්කිරි ලබා නොදීම නිසා පියයුරු පිළිකා ඇතිවීමට ඇති හැකියාව වැඩි වේ. මව්කිරි ලබාදීමෙන් ඔබට පියයුරු පිළිකා වැළඳීමට හැකි අවධානම අඩු කරන අතරම ඔබ ආරක්ෂා කිරීම ද සිදුකරයි.
- දුම්බීම හා මධ්‍යසාර භාවිතය ද පියයුරු පිළිකා ඇතිවීමේ අවධානම වැඩි කරයි.
- විකිරණ (RADIATION) වලට නිරාවරණය වීම.
- ශරීරයට නිසි ව්‍යායාමයක් නොලැබී යාම සහ අධික මානසික පීඩනය
- ජානමය හේතු උදා:- BRCA1 & BRCA2
- ජන වර්ගය
යුරෝපීයයන්ගේ සහ ඇමෙරිකානු අප්‍රිකානුවන්ගේ පියයුරු පිළිකා අවධානම වැඩි අතර ආසියානුවන්ගේ පියයුරු පිළිකා අවධානම අඩුය.
පියයුරු පිළිකා තිබීමේදී ඇතිවිය හැකි රෝග ලක්ෂණ:-
- පියයුරු වල ගැටිත්තක් (ගෙඩියක්) හසු වීම.
- බෙල්ලෙහි, කිහිලි වල කුද්දැටි ඉලිප්පී තිබීම.
- තනපුඩු වලින් අසාමාන්‍ය ස්‍රාවයන් නිකුත් වීම. (සමහර අවස්ථා වල රුධිරය මිශ්‍ර ස්‍රාවයන්)
- තනපුඩු වල හැඩය වෙනස් වීම.
- පියයුරු වල ප්‍රමාණය හා හැඩය වෙනස් වීම.
- තනපුඩු වල හා පියයුරු වල මතුපිට සම වෙනස් වීම.
- සමහර අවස්ථා වල පියයුරු වල වේදනාවක් ඇතිවීම.
- කලෙක පටන් පවතින ආහාර අරුචිය
- ඉක්මණින් බර අඩුවීම.
පියයුරු පිළිකා හඳුනාගැනීම සඳහා සිදුකරන පරීක්ෂණ:-
රෝග ඉතිහාසය හා රෝගියාගේ පියයුරු ඉතා හොඳින් පරීක්ෂා කිරීමෙන් අනතුරුව පියයුරු පිළිකාවක් යැයි සැක කෙරෙන අවස්ථා වලදී, මෙම පරීක්ෂණ වලට යොමු කරනු ලැබේ.
SCAN පරීක්ෂණ:-
- පියයුරු වල අල්ට්‍රා සවුන්ඩ් ස්කෑන් පරීක්ෂණ (BREAST USS)
- MAMMOGRAM
- MRI SCAN
බයොප්සි (BIOPSY) හා සෛල පරීක්ෂණ:-
- FNAC – FINE NEEDLE ASPIRATION CYCOLOGY
- CORE – NEEDLE BIOPSY
- LYMP NODE BIOPSY
- URGICAL BIOPSY
පිළිකාවේ පැතිරීම බැලීම සඳහා සිදුකළ හැකි පරීක්ෂණ:-
- CHEST X RAY (පපුවේ X RAY පරීක්ෂණ)
- අස්ථි ස්කෑන් පරීක්ෂණ (BONE SCAN)
- CT SCAN
- MRI
පියයුරු පිළිකා සඳහා විවිධ ප්‍රතිකාර පවතින අතර එය පහත සාධක මත රඳා පවතී.
- පියයුරු පිළිකාවේ වර්ගය
- පිළිකාවේ තීවෘතාවය හා පැතිරී ඇති ප්‍රමාණය
- පිළිකා සෛල වල හෝමෝන සංවේදීතාවය
- රෝගියාගේ වයස
- රෝගියාගේ අනෙකුත් රෝග හා සමස්ථ නීරෝගීභාවය
- රෝගියාගේ කැමැත්ත
ප්‍රතිකාර වර්ග:-
- ඖෂධ මඟින් ප්‍රතිකාර කිරීම. CHEMO THERAPY TARGETED DRUG THERAPY
- හෝමෝන ප්‍රතිකාර උදා:- TAMOXIFEN
- විකිරණ ප්‍රතිකාර (RADIATION THERAPY)
- ශල්‍යකර්ම මඟින් පියයුරු ඉවත් කිරීම. (SURGERY) MASTECTOMY LUMPECTOMY
පියයුරු පිළිකාවක් ඇතිවීම වළක්වා ගැනීමට සහ පිළිකාවෙන් සිදුවන හානිය අවම කර ගැනීමට ඔබට කළ හැකි දේවල්:-
- තමන්ගේ පියයුරු මාස තුනකට වරක් තමන්ම පරීක්ෂා කර බැලීම (ගැටිත්තක් වගේ හසු වේ නම්, වහාම වෛද්‍ය ප්‍රතිකාර ලබාගන්න.
- පියයුරු පිළිකා සායන වලට සහභාගී වී පරීක්ෂා කරවා ගැනීම.
- දුම් පානය, මධ්‍යසාර භාවිතයෙන් වැළකී සිටීම.
- ව්‍යායාම කිරීම.
- ශරීරයේ බර නිසි අයුරින් පවත්වා ගැනීම හා පෝෂ්‍යදායී ආහාර වේලක් ලබා ගැනීම.
- තමන්ගේ බිළිඳුන්ට හොඳින් මව්කිරි ලබාදීම.
- ආර්ථවහරණයෙන් පසු සුදුසු හෝමෝන ප්‍රතිකාර ලබාගැනීම.
විශේෂඥ වෛද්‍ය රොහාන් ලියනගේ